alexametrics
Menu
عمر بن عبد الله بن عمر آل سليم
عمر بن عبد الله بن عمر آل سليم

خطتس اللي كزيتي وصلن وفرحت بُه

الأحد - 25 رمضان 1428 - 07 أكتوبر 2007 - 02:31 م
http://www.burnews.com/u/upload/wh_50103233.jpg خطتس اللي كزيتي وصلن وفرحت بُه ابارك لكم العشر الأواخر وكل عام وانتم بخير: المملكة العربية السعودية .. البلاد الغالية علينا قارة فيها عدد من المناطق تباينت فيها اللهجات والعادات وطريقة اللبس والأكل ونوعية الأكل وتوزيع اماكن البيت الجلسات فيه الشعبية وتوزيع الغرف واشكال البيوت .. الخ . لكن اللهجة القصيمية مميزة .. بدأ بكلمتين شهيرتين \"بوه \" و\"ماهوبوه\" يعني موجود وغيرموجود .. ولكن دعونا نعود للوراء كثيرا وليس قليلا: خطتس اللي كزيتي وصلن وفرحت بُه: الترجمة : خطابك الذي ارسلتيه وصل الي وقد فرحت به: السلام عليكم ورحمة الله وبركاته ، : اقترح علي الأستاذ عبدالرحمن الفراج موضوع مرح للعيد بدل الجد ومالقيت الا لهجتنا اللي ينكت علينا فيها ذولي حقين الرياض بحثت ولقيت رسالة في احدى المنتديات هذه الحواديت كانت قبل خمسين عاما ايام اذاعة طامي والراديو الروسي والكسولة والقنارة والبركسة والشنة والقسربة .. والسقاء ... رحم الله من عايش تلك السنوات .. اين شيباننا الذين رحلو لينظرو كيف تغيرت الدنيا !!! هذه نص الرسالة خطتس اللي كزيتي وصلن وفرحت بُه .. وكثر الله خيرتس على المقطع والغدفة اللي كزيتي لي ، وابشرتس أن اخبارنا تسرتس .. البقرة أضنت ، والبيض فقش ، والدجاجة الرقطا راجن ، وان ادحيم العلي أعرس ، ونوّير مخطوبة ، وعويش فطمناه ، وطريفة رفّعناه من السقاط ، وصويلح شراله دنانة ، وسليّم ختم المصحف ، واعزيز الصالح طاب من الطنان ، وبريه ولد رقية بدا يحبي ، والحمد الله طاب الجحام اللي بعينه ، وانتي صاتزه حطينا عليه تبنه ، وحصيصة طابت اقطوفه اللي براسه ، ومنيرة مشطناه بوردة ، وأم دريحم طلعت من الماجب ، وتممنا لدريحم ، والنعال الزنوبا اللي تخبرين عندنا هاك السنة خطناه ، ومقطع الروز خبناه ، والدوشق غيرنا قطاعته ، والسفرة الكبيرة علقناه بالقبة ، وحطينا بيت للرادو ، والمصحف حق عمي غيرنا ثوبه ، والسراج زينا فتيلته ، والزبيل مليناه حتات من إنخلتنا ، وشرينا سحارة ولقيناه مكسورة .. وبقولس إني مع هالحمولة غاديتن حوسة ، الطاية تخر ، والمثعب منشق ، والقتالة منقلعة ، وباب الروشن منكسر ، والتسوله مسنيّه ، وبريتز الغرش الصغير منقشع ، والله يهديتس .. يا أم دحيم .. البزار اللي كزيتيه شوي كركمُه ، والمسمنة تقل رماد ما به ليمون ، والفتيت مسري ، والكليجا تقل عظامة . واذا بغيتوا تكزون شي .. كزوا شي يبل الريس ويواجه عند الحمولة . معكم علم ان حمولتنا ناس ينقدون بتلة . وخالتي بس تشره ، وعمتنا حقنة ما يجوز لها الشين ابد ، وحريم عمومتنا صرت اثم لهن ، وجذعانهم فرقا عين جدي شيبان كبري يترددون على هالجصة أقضو تمره تقل دبا ، وأنا ما ودي أطول عليتس الحتسي عسا ما يخلين منتس ، ولا من جناين قلبتس ، لاخلا ولا عدم وسلميلي على من نشد عنا ، وأخص بالسلام لطيفة وهيا وقوليلهن والله ما خلان أقصر عنوتي عنكم وأشوفكم إلا اني عويجزة ولاصقه على ظهيري وضليعاتي ومارخة كتوفي ورجيلاتي بالفقس .. ومعتس علم هالارياح يعودنن بتلة ومع هالبراد صايلات علي يالله حسن الخاتمة والعمل الصالح .. وسلمي وأنتي سالمة .. الترجمة .. كيف؟؟ ___________ الأخوة من غيراهل القصيم نبي نبين لكم حل اللغز: : الحموله ذابحين كاتب الرسالة واضح انهم .. قشران في احد المنتديات قرته وحدة تجخ متمدنه على قولت اهل بريدة قالت: بصراحه اللهجه القصيميه تلوع الكبد كلها تس تس تس تس ياعيني على اللهجه الشرقاويه والحجازيه بصراحه لايعلى عليها **** فيه قصيمي من أهل عنيزة قابله صديقة بأمريكا .. صار له فوق الثلاثين سنة ما رجع للسعودية .. متزوج أمريكية وله عيال وبنات .. وحالته المادية ممتازة ... وأنت تتكلم معه .. تقول أمس جاء لأمريكا ... فيقول : اشتقنالك وابطيت علينا قال ذاك : يابيي حتى بمريكا تنشدون عنننننننننننننن !! الشاهد .. إن أهل القصيم اكثر ناس متمسكين بلهجتهم ... و ياحول الي ماله بريدة .. على راي ابوصدام عندما كان في بيروت. في حلقة قادمة : ساتكلم عن ترجمة بعض معاني الكلمات القصيمية خاصة القديمة. alsaleem_o_a@hotmail.com عمربن عبدالله بن عمر ال سليم ابو احمد ذكرتنا بالماضي ياابو محمد ............ فعلا لهجتنا لها طعم مميز وصعب على القصيمي مهما تغرب عن (((ديرته ))) تتغير لهجته .....نكهة خاصة مثل المسمار في القهوة (مميزة) أخوك أبو أحمد ثالث أيام عيد الفطر النايف الاخ العزيز عمر كل الشكر على الموضوع اللي خلينا نظحك ,, الاخ عمر .. بالنسبه لأبوصدام عندماقال كلمته المشهوره ((ياحول اللي ماله بريده)) كان في المدينه المنوره ,,, وليس موجود في بيروت على حد قولك تحياتي لك .... النايف عمر بن عبد الله ال سليم الأخ النايف كان في بيروت .. كل عام وانتم بخير
الكلمات المفتاحية