تعرضت الفنانة المصرية رحمة حسن إلى حادث مفزع، إثر هجوم كلب شرس عليها وعضها من منطقة حساسة بجسدها، ونقلت الفنانة رحمة حسن إلى المستشفى لتلقي العلاج اللازم.
وكشفت رحمة حسن عن تفاصيل تعرضها للهجوم على يد كلب شري، ونشرت عبر صفحتها الرسمية على انستجرام، موضحة أنه أثناء عودتها إلى المنزل، لاحظت جارتها التي تقطن بنفس الشارع وهي تستقل سيارتها وبداخلها كلب من نوع «جيرمن شيبرد».
وتابعت رحمة حسن قائلة: «إمبارح الساعة ١١ بليل كنت نازلة أجيب حاجة من السوبر ماركت جمب البيت، كنت ماشية على الرصيف وكان في عربية بتركن جمبي عادي، فجأة الباب اتفتح ولقيت كلب جيرمن شيبرد بيهجم عليه بكل قوته».
وتابعت: «طبعا حاولت أجري لكن للأسف الكلب كان قوي وشرس ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقة حساسة».
وأضافت رحمة حسن: «صاحبة الكلب كتر خيرها أخذتني فورًا على مستشفى إمبابة، ادوني حقنة تطعيم الكلب ولسه فاضل لي ٤ هاخدهم خلال شهر، بس المشكلة أن من امبارح الجرح بينزف دم كتير، وأنا طبعًا خايفة ومصدومة وتعبانة وعندي تورم من إمبارح واللي واجعني أكتر أني مَش عارفة أتصرف إزاي، خصوصا أني أكيد مَش عايزة الكلب يتأذي، بس كمان مَش عايزة أي إنسان كمان يتأذي ويتعض ويتبهدل في الشارع زيي».
وأكدت رحمة حسن أنها اعتادت رؤية صاحبة الكلب وهي تنزه، وكنت تتجنبه، قائلة: «أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بمشي بعيد عنه لما بشوفه، امبارح صاحبة الكلب قالت لي متخافيش هو عض ولادي قبل كدا وتمام محصلش حاجة».
و طمأنت رحمة حسن متابعيها بعد تعرضها لعضة كلب، مؤكدة أن الكلب الذي عضها ليس مسعورًا قائلة: «متشكرة جدا لاهتمامكم ولكل الناس اللى كلمتنى تطمن عليا وبالنسبة للكلب فاحنا اتكلمنا مع صاحبته وطلبنا منها توديه مركز تأهيل وتدريب علشان تعدل سلوكه وإلا هاعمل محضر وساعتها الكلب اللى هايتضر وهى كانت متفاهمة جدًّا ووافقت».
